Bizim Kamaz - (10/02/2015)

Xəbər verildiyi kimi, “Gəncə Avtomobil Zavodu” İstehsalat Birliyi (İB) və KAMAZ (“Kama Avtomobil Zavodu”) ASC Azərbaycanda KAMAZ avtomobillərinin yığılması və üçüncü ölkəyə satışı üzrə rəsmi distribütor sazişi imzalayıblar.

FEVRALIN SONU İSTEHSAL BAŞLAYA BİLƏR

Azərbaycanda ilk KAMAZ avtomobilinin yığılması 2015-ci il fevralın sonu-martın əvvəlinə təsadüf edəcək. Respublikada bu avtomobillərin tam yığılması prosesi aparılacaq.

ASC-nin yaydığı məlumata görə, istehsal prosesinin başlanmasına hazırlıq çərçivəsində KAMAZ ASC-nin baş direktoru Sergey Koqoginin başçılıq etdiyi nümayəndə heyəti Gəncəyə gəlib. Səfər zamanı Gəncə avtomobil zavodunda hazırlığın yüksək səviyyəsi, sənaye gücü, potensial və təcrübəsi, bazarın geniş imkanları, demək olar ki, ölkənin bütün regionlarında mövcud olan zavodun xidmət mərkəzlərinin hazırlıq səviyyəsi qeyd edilib.

Bundan əlavə, səfər zamanı “Gəncə Avtomobil Zavodu” İB-nin Müşahidə Şurasının rəhbəri Xanlar Fətiyev və İB-nin direktoru Kamran Nəzərov qonaqları müəssisədə istehsal prosesinin təşkili ilə tanış ediblər.

1

İXRAC EDİLƏCƏK

Səfər çərçivəsində KAMAZ ASC-nin baş direktorunun Azərbaycan Baş nazirinin birinci müavini Yaqub Eyyubovla görüşü olub. Görüşdə tərəflərin KAMAZ avtomobillərinin istehsalı və onların üçüncü ölkəyə ixracı sahəsində tərəflərin əməkdaşlığının perspektivləri və imkanları qeyd edilib və yüksək qiymətləndirilib.

"GÖRDÜKLƏRİM MƏNİ TƏƏCCÜBLƏNDİRDİ"

“Mən sonuncu dəfə Gəncə haqqında 10 il bundan əvvəl eşitmişəm. Elə hesab edirdim ki, zavod hələ tam qurulmayıb və sözün düzü burada "KamAZ"-ın istehsal xəttinin işə salınacağına bir az şübhə ilə yanaşırdım. Lakin Gəncə Avtomobil zavodunda gördüklərim məni sözün yaxşı mənasında təəccübləndirdi. Burada çox böyük işlər görülüb. Müəssisə texnoloji parametrlər baxımından avtomobil istehsalına hazırdır. Zavodun 500-ə yaxın əməkdaşının olması, onların yığım təcrübəsi Gəncədə "KamAZ"-ın yığılmasına imkan verir”. Bu sözləri  “KamAZ” Açıq Səhmdar Cəmiyyətinin (ASC) baş direktoru Sergey Koqogin deyib. 

S.Koqogin görülən işləri müsbət qiymətləndirib və qeyd edib ki, zavod artıq yetərincə yük avtomobillərinin yığım təcrübəsinə malikdir: “Gəncə Avtomobil zavodu ilə artıq lisenziya müqaviləsini imzalamışıq. Mənim Azərbaycana gəlişimin məqsədi hər şeyi yerində görmək və müzakirə etmək idi. Biz arxayın olmaq istəyirdik ki, tərəfdaşlarımızin "KamAZ" istehsal etmək istəyi ilə bərabər, həm də imkanları və şəraitləri var. Bizim üçün "KamAZ" brendi çox önəmlidir. Gəncədə yığılacaq KamAZ avtomobillərinin keyfiyyəti əsas konveyerdəkilərdən fərqlənməməlidir. Buna görə də biz istənilən formada yerli əməkdaşlara lazımi köməklik edəcəyik. Lazım gələrsə, bizim mütəxəssislərimiz bir müddət Gəncəyə ezam olunacaqlar və onlar da yerlərdə həmkarlarının ixtisaslarının artırılmasında yardımçı olacaqlar”.

S.Koqogin həmçinin vurğulayıb ki, gələcəkdə Gəncədə yığılan texnikaların ölkə hüdudlarından kənarda satılması da həyata keçirilə bilər. Azərbaycanın Asiya ilə yaxınlığı bu layihənin reallaşdırılmasında böyük pay sahibidir.

 

Məlumat Marja.az-dan götürülüb


Copyright © 2020 WWW.MAKINA.AZ
Müəllif hüquqları qorunur. Məlumatdan istifadə etdikdə istinad mütləqdir.