CaspianAgro 2017 | Media dəstəkçi MAKINA.AZ - (17/03/2017)

17-19 may tarixində Azərbaycan Respublikasının paytaxtı Bakı şəhərində kənd təsərrüfatı və qida məhsullarının nəhəng regional forumu – 11-ci Azərbaycan Beynəlxalq  Kənd Təsərrüfatı “CaspianAgro 2017” sərgisi keçiriləcək. Keçirildiyi illər ərzində “CaspianAgro” sərgisi hər il mütəxəssislər arasında görüşlərin keçirilməsi, habelə kənd təsərrüfatı sahəsi üçün texnika və avadanlıqların, eləcə də məhsul və xidmətlərin nümayişi baxımından etibarlı platforma kimi özünü doğrultmuşdur.

Kənd təsərrüfatı sektoru daim ölkə rəhbərliyinin diqqət mərkəzindədir və artıq ardıcıl olaraq bir neçə ildir ki, Azərbaycan Respublikasının Prezidenti cənab İlham Əliyev sərgini ziyarət edərək istehsalçı və distribyutorların Azərbaycan bazarı üçün təklif etdikləri yeniliklərlə yaxından tanış olur. “Azərbaycan Respublikası regionlarının 2014-2018-ci illərdə sosial-iqtisadi inkişafı” adlı Dövlət Proqramının həyata keçirilməsinin üçüncü ilinin yekunlarına həsr olunmuş konfransda qeyd edilmişdir ki, hazırda kənd təsərrüfatı sektoru ölkədə uğurla inkişaf edir, ötən il ilə müqayisədə 2.6 faiz inkişaf edib və bu müsbət dinamikanı qoruyub saxlamaq üçün gələcəkdə daha ciddi addımlar atılacaq.

Uzun illərdir ki, Azərbaycan Respublikası Kənd Təsərrüfatı Nazirliyi “CaspianAgro” sərgisinə yaxından dəstək göstərir və sərginin işində fəal iştirak edir. Azərbaycanda İxracın və İnvestisiyaların Təşviqi Fondu (AZPROMO) və Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK) tərəfindən dəstəklənir. Sərginin təşkilatçısı qismində isə “Caspian Event Organisers” (“CEO”) şirkəti çıxış edir.

Bu il “CaspianAgro 2017” sərgisində Azərbaycan, Belarus, Çin, İtaliya, Rusiya, Şri-Lanka, Türkiyə və digər ölkələri təmsil edən kənd təsərrüfatı məhsul və avadanlıqlarının istehsalçı və distribyutorları iştirak edəcəklər. Üçüncü ildir ki, sərgidə Gürcüstan öz milli pavilyonu ilə təmsil olunacaq. Bu il debütantların arasında İpək Yolu üzərində, Jianqxi (Ciangşi)  (Çinin cənub hissəsi) vilayətini təmsil edən Çin şirkətləri var.

Həmçinin, bu il ilk dəfə olaraq Niderland Krallığı sərgidə tərəfdaş-ölkə qismində çıxış edir. Ötən il sərgini ziyarət etmiş Maastrix Menecment Məktəbinin prezidenti, Niderland Krallığı Senatının keçmiş sədri və Aİ Parlament Assambleyasının (“PASE”) fəxri rəhbəri cənab Rene Van der Linden qeyd etmişdir ki: “- Bu sərgi kənd təsərrüfatı sektorunun inkişafı, xüsusən də “B2B” (“korporativ kommersiya əlaqələri”) formatda püxtələşməsi üçün əla imkan yaradır. Bu forum məni valeh edib və mən hesab edirəm ki, Niderland şirkətlərinin bu sərgidə iştirakı qarşılıqlı faydalı əməkdaşlıq əlaqələrinin daha da genişlənməsinə kömək edəcək.” Beləliklə, Niderland Krallığının sərgidə tərəfdaş ölkə qismində çıxış etməsi holland şirkətlərinin “CaspianAgro” sərgisində çoxillik iştirakının uğurlu nəticəsidir. “CaspianAgro 2017” sərgisinin qeydiyyat üzrə sponsoru “Grand Motors” (Azərbaycan) şirkətidir.

Ümumiyyətlə, sərgi kənd təsərrüfatı sənayesinin ən aktual sahələrini əhatə edir və bir sıra innovasiyalarla tanış olmaq üçün ideal imkan yaradır. Bu innovasiyalara quşçuluq fabrikləri üçün avadanlıqlar, istixana avadanlıqları, istifadəyə hazır istixanaların tikintisi, heyvandarlıq sektoru üçün avadanlıqlar, substratlar, heyvan və balıq yemləri, toxumlar, mineral gübrələr, kənd təsərrüfatı texnikası və s. daxildir. Bu il sərginin aşağıdakı sektorları daha geniş tərkibdə nümayiş etdiriləcək: suvarma sistemləri, son illər Azərbaycanda güclü inkişaf etmiş pambıqçılıq sahəsi üçün kənd təsərrüfatı texnikası. Sərginin “Laboratoriya avadanlıqları” sektorunda mikroskoplar, aparatlar və kənd təsərrüfatı məhsullarının məhsuldarlığını artırmaq və bitkilərin çəkisindən tutmuş zərərli vasitələrə yoluxma dərəcəsinə, eləcə də rütubət tərkibinin faiz göstəricisinin öyrənilməsinə qədər bir sıra digər cəhətləri müntəzəm olaraq araşdırmaq üçün nəzərdə tutulmuş laboratoriya cihaz və avadanlıqları təqdim olunacaq.

Sevindirici haldır ki, sərginin bu sektorlarında xarici istehsalçılarla yanaşı, yerli şirkətlər də iştirak edəcəklər. Kənd təsərrüfatı öz xidmətlərini təklif edən istehsalçı, distribyutor və müəssisələrdən ibarət Azərbaycan şirkətləri sərgi eksponentlərinin 40%-ni təşkil edir. Bundan başqa, ənənəvi olaraq, “CaspianAgro” sərgisində ən son avadanlıq və texnikalarla tanışlıq məqsədi ilə Azərbaycan regionlarını təmsil edən sahibkar və fermerlər üçün info-turlar təşkil olunacaq.

Beləliklə, “СaspianAgro 2017” sərgisi iştirakçılara ən son tendensiyalarla tanış olmaq üçün imkan yaratmaqla yanaşı, əməkdaşlığı genişləndirmək və yeni işgüzar əlaqələr qurmaq üçün də lazımı şəraiti təmin edəcək. Bu isə Azərbaycanın kənd təsərrüfatı sənayesinə investisiya yatırımını artırmağa, eləcə də bu sahədə ən son texnologiyaların tətbiqinə kömək edəcəkdir.

 

 

 

 


Copyright © 2017 WWW.MAKINA.AZ
Müəllif hüquqları qorunur. Məlumatdan istifadə etdikdə istinad mütləqdir.